Aña ‘den aña fo
mi a kore den awasero
semper ora
sushidat a kontagia
mi pensamento.
Aña ‘den aña fo
mi a balia mi sehú
mi só
den e furu di mi p’aden.
Aña ‘den aña fo
mi a sakrifika un pida karni
semper ora
famianan a sinta chalalá redashi
pasó’ mi n’ ke hoga
den e wowo di awa
ku ta lastrami den un remolino
di kustumbernan sin balor.
Aña ‘den aña fo
mi a sigi muri den yobida
i e semia di mi nasemento
den un mundo nobo kolektivo
a bin floria.
