Den mi soño
spiritu di mi wela
ta supla den mi orea:
‘Bo sanger ta mas diki
ku di tur…’
i den anochi skur
mi ta hañami ta karga
fligí ku un soledat intenso
e Tumba inmenso
di tur mi antepasadonan
Bos di sanger
papia kla
Ki tur e kosnan aki
ta nifika?
Boso tin pa mi
un tarea
un mishón wardá?
T’ami ta Eslabon
ku mesté sigui uni
Generashon?
T’ami tin di mantene
un Tradishon
k’a origina
den selvanan di Afrika
o nasí foi den mondongo
di sabana
na Bushiribana?
Ta mi sanger Alemán
ta yora
morto di mi ruman
o ta e indomitabel Israel
den mi
ta kanta melodía
di David?
Bos di sanger,
papia kla
Mi n’ ta dotá
ku profundidat
pa interpretá
parábola
Sinembargo,
den tur sinseridat
me ke kumpli
ku bo enkargo
