Cu garganta doblá bo ta hinca rudia
sperando pasivo guillotina ‘i probesa.
Nan ta pluma bo blachi,
lagabo sunú i marchitá.
Bon’ ta sinti, bon’ tin boca?
Bouquét di flor engañá,
lew fo’i bo tera bo ke busca
un solo friw, mientras tin un
ta hasa bów panch’i bo mes cas…
Bouquét di silencio,
jena bo pecho, alsa bo stem!
Kèlki hel, heraldo di Playa,
ronca trompèt di guerra!
Rosa balente di Santa Cruz,
saca bajonèt di sumpiña!
Gladiola, gladiator di Nòrt,
lombra bo bélico spada!
Bringamosa brabo di San Nicolas,
gatia muraja di Yanquilandia!
