I
mi ta convinci
di mi vocacion
di mi amor
di mi odio.
mi exclamacion
pa nos isla bira
un isla yen di bida nobo
II
lo mi kier splika
pa no tin quivocacion
ku mi idealismo
lo seka lagrimanan skondí
i mira pa mi amor
hanja tera
pa mi grito duna fruta
III
i hunto
nos lo cosecha
un bida di nos mes,
un expresion di solo
ku ta kima riba nos lomba
lombra nos bida
dun’ele splendor dje mes
IV
ku palabra
no bruha nos pensamentu
ku biento no hiba nos
i supla laga nos basjí
p’e hunga su wega di caco skondí
den nos skeleta ora
nos no ta nos mas
V
ora morto gatia mi curazon
i mainta manece ku disgusto
lo mi percura pa mi mannan ta firme
lo mi skirbi sofoka sanger fei djé papel
pa tin grabá na shelo como na tera
mi mokote será, mi desesperacion christalisá
mi odio sin fin, mi amor sin fin
