Fuente: Poesía bibo di Aruba
Den un forma kriminal,
Pa un guera kruel i fatal
Nos tera a ser sagudi
I hopi bida a bai perdi.
Den e lucha tan feros
Ruman a mata ruman,
I mil otro kos mahos
Riba tera, den laman
I den laira a sosode
Pa sinja homber i spiert’e
K’el a koge direksjon
Di su propio destruksjon.
Hende sabí a skirbi
Ku tin biaha rebolusjon
Di kosnan kun’ ta sirbi
Por trese ebolusjon.
Ma si nos para mira
Ki lesnan mundu a saka
For di tantu sufrimentu,
Lo nos sklama ku lamentu:
Desgrasiado humanidat
Ta kon hundu bo ke kai?
Bo n’ ta sinti ya piedat
Pa tantu ruman k’a bai?
Ku un sonrisa selestial
Despues di un tratu bestial,
Mijones a bisa ajo
Pa bo haja un mundu miho.
Ma si odio sigui reina
Den un kamber, den un kas,
Mundu lo sigui pena,
Buskando en bano su pas.
