Fuente: Poesía bibo di Aruba
Den añanan di flor
m’a soña ku bo
hòmber pretu
orguyoso
sin bèrguensa
pa bo mes koló,
sin doló
di sklabitut
ta huña
den bo pechu mas
Fo’i bo forsa
i bo fé
lo m’a saka
inspirashon
pa bira
mes muhé
ku Mama Afrika
Den añanan di flor
m’a warda riba bo
ku makutu yen
di mango
ku tamarein
Awó, katuna
a kuminsa
ta tapa mi kabes,
ilushonnan kasi tur
ta derá
Ma kisas
aki un shen añ’asina
nos spiritu
lo por topa ‘nochi
bou di un pal’i indju
den un sabana grandi
luna kla
Kisas kaminda
sanger di katibu
a yeg’i drama
nos lo tene man
i logra na penetra
e pakiko
di nos destino
separá
