Palo di divi-divi, ku ta
bira lomba i tapa kara
pa byento ku sota di faha,
flornan di anglo ku ta
parse bisa: ata mi ki,
ami ta esun di mas bunita
den tur bow di e solo aki,
lagadishi ariba pyedra skèrpi,
sin nada di hasi ku warda solo
pasa riba su kabes pa despwes
kore skonde bow di pyedranan,
kwihinan, kansá di krese
den un direkshon, ta dobla
kabes pa tera i tapa su mes
un sombra ku e punta di su
dédenan seko sin yobida,
esey ta mi isla den solo,
kanto di laman, riba kwal
naturalesa ta sigi biba
sin prekupa su mes, ko lo
ke ta susede rònt di dje.
