Ki bo sa di amor
bo cu nunca a sinti
e angustia ni palpitacion.
Ki bo sa di amor
si nunca bo a sinti bo
curazon yaga, pa n’ cura mas.
Ki bo sa di amor
si desprecio nunca tabata
bo suèrtè. Cu nunca b’a
sinti nan mofabo ni
bo alma n’ bati den bo
boca di susto p’a perde.
Acaso b’a bira victima
di mal pasion o promesa falso
Acaso bo tambe conoce e berea
di Calvario; b’a carga cruz
o pa bista’i pueblo b’a bisti
bo curason cu lagrima i luto?
Ki bo sa di amor
si nunca b’a lastra na rudia
ni implorá pa tera habri cu bo.
Ki bo sa di amor
si pa e ser kerí bo n’ suspirá
pa morto pone un fin na bo
dolor?
O por ta cu bo tambe a sucumbí
cargá bao di peso y pena. O cu
tin bez e sonrisa a cubri un
curazon sangrá? O cu b’a yora
desesperá, scondí bo so anochi;
bo so, secretamente. So cu Dios?
