Fuente: Poesía bibo di Aruba
Ma Tera no a dòrna mi kweru ku
tapushi ku ta lombra mané oro,
ni Lamán no a bisti mi ku plata
pa mi kana karisiá boso wowo.
Den religión o den nos karnaval,
ta sombra i klaridat a brasa otro:
nos alma a bira skur den skoch’i yaya,
nos bena a bebe bruha for di Congo.
Nos lenga mes ta un rosa di katibu
k’a saka fo’i nos pechu kach’i toro,
nos fréntenan tin plum’i tur koló,
ma padén tin un tambú di petrolio.
Trigueña a tiña sánguer di Oropa
ku sintur’i su tumba den horopo,
pero si anochi boso lòs fo’i día,
tur gai lo bira piedra den nan soño.
Shinishi, preto, sin koló m’a keda,
di pursi Tera ku Lamán ta lodo.
Antó kwá? Si mi koló ta shinishi,
ta pasobra boso n’ por mira solo!
