Un anochi mi a soña
ku mata a kum’sa kana
invadi mundo ku nan reis.
Tur lugá ku nan a para deskansá
a bira berdura pa kada be mas mondi.
Mata tur kaminda
den tur burako, palu
te nan a kum’sa enkarná ku hende.
Papai a bira kibrahacha
machi, kwihi
den su sombra
mi ruman hòmber tabak’i piskadó
esnan muhé, kayena
di tur klase di koló.
Nan a perseguimi
te leu ayá den kabes di Yamanota.
Ey, bou di shelo kla
drumí riba un altá di yerba
nan a sinta parasitá den mi mondongo
tuma loke ta di nan
te ora ku mi karni a bira palu
i un krans di flor a dòrn’e yerba.
